Aclıq
... Əgər Tanrıya şükr edirsənsə, mənim üçün də et!
Filmdə 1800-cü
illərdə Danimarkanın bir şəhəri olan Kristianiada yaşayan və bir yazar olan Pontusun
(Per Oscarsson) keçirdiyi ağır günlərdən bəhs edilir. Pontus, günlərinin çoxunu
aclıq və səfalət içində keçirən, tək qazancını ara sıra yazdığı məqalələr sayəsində
əldə edən biridir. İşlərinin heç də qaydasında getmədiyini filmin lap əvvəllərində
anlayırıq (Pontus aclıqdan yazdığı kağızları yeyir).
Qaldığı evin kirayə
haqqını da verə bilmədiyinə görə ev
sahibəsi tərəfindən qovulan Pontusu isə qarşıda daha çətin günlər gözləyir.
Sahib olduğu əşyaları girov qoyaraq aldığı pullar da onun vəziyyətini düzəltməyə
yetmir. Başqa işlər görmək üçün axtarışlara başlayan qəhrəmanımız burada da müvəffəqiyyətsizliyə
uğrayır. Nə olursa olsun həyatı sevən və yaşamaq uğrunda mübarizə aparan Pontus
artıq üsyan etməyə başlayır. Hər şeyin səbəbini tanrıya və tanrının özünə qarşı
pis rəftarına bağlaması ruhunda başqa cür aclıqların meydana gəlməsinə səbəb
olur. Amma bu mənəvi aclıqdan daha ciddi olanı Pontusun mədəsində gündən-günə
böyüyən fiziki aclığıdır.
Per Oscarssonun canlandırdığı Pontus
xarakteri, heç şübhəsiz kino tarixində eyni rolu bu qədər təsirli canlandıran
çox az xarakterlərdən biridir. Pontus ac olmasına baxmayaraq xoşbəxtmiş kimi
davranan, ona yemək almağa çalışan dostuna tox olduğunu söyləyəcək qədər
qürurlu xarakterdir. Bu qədər qüruru isə bir müddət sonra onun
professional bir yalançıya çevrilməsinə səbəb olur. Bütün bunlar azmış kimi
tanış olduğu gözəl bir qadınla olan münasibəti Pontusun işlərini daha da çətinləşdirir.
Danimarka,
Norveç və İsveç ortaq istehsalı olan filmin rejissoru Henning Carlsendir. 1920-ci
ilin Ədəbiyyat üzrə Nobel Mükafatının sahibi Norveçli yazar Knut Hamsunun 1890-cı
ildə yazdığı "Aclıq" romanı əsasında 1966-cı ildə ekranlaşdırılan eyniadlı film, 20-ci əsrin ədəbi açılışı olaraq görülməklə yanaşı
həmçinin müasir və psixo-ədəbiyyatın ən əhəmiyyətli nümunələrindən biri sayılır. Əsərdən uyğunlaşdırma
olduğu üçün ssenarinin müvəffəqiyyətli alındığı inkar edilə bilməz. Filmdə Per
Oscarssonun aktyorluğu da çox uğurlu alınıb. 1966-cı ildə Kann Film
Festivalında ən yaxşı kişi aktyor mükafatına layiq görülməsi də bunu bir daha
sübut edir. Filmdə
Ylajali obrazını canlandıran Gunnel Lindblom isə bizə
Bergmanın "The Seventh Seal", "Wild strawberries" və
"Scenes from a Marriage" filmlərindən tanışdır.
Film, ictimai həqiqətin əhəmiyyətli
nümunələrindən biri sayılır və Danimarka Mədəniyyət Nazirliyi tərəfindən təyin
olunan mədəni kinonun ən yaxşı on filmi sırasında yer alır.
Amerika
müstəqil kinosunun əsas
simalarından olan Abel Ferrara ölkəmizdə o qədər də tanınmır. Müxtəlif
janrlarda film çəkmiş Abel Ferraranın filmlərinin ortaq xüsusiyyəti demək olar
hamısının narahatedici olmağı, böyük bir sıxıntı və zülmət duyğusuna sahiblik
etməyidir. İtaliya əsilli rejissor filmlərində Amerika cəmiyyətinin qayğılarını,
narahatlığını və kabuslarını dilə gətirib. Digər böyük rejissor Skorseze qədər
dərin olmasa da bəzi filmlərində
yaşadığı ölkənin arxa küçələrini, kasıb məhəllələrdəki səfaləti,
çürüntünü diqqətə çatdırıb. Onun filmləri o qədər qaranlıq və narahatdır ki, bəzi
tamaşaçılar onun filmlərini izləməkdə çətinlik çəkir. Bu filmlərə baxmaq üçün
sağlam əsəb sisteminə malik olmağınız şərtdir.
Liberal sistemdə cinayətkar və qurban dialektikası üzərində
inşa edilən bir satirik film olan "A Clockwork Orange" Stanley
Kubrick filmoqrafiyasında vacib yer tutur. Kubrick bu filmi ilə
cinayətin mənşəyinə enmək əvəzinə nəticələrini araşdırır, tənqidi oxlarını
liberal quruluşa yönəldir. Modern dünyanın təşkilində mühüm yer tutan
dinamikaya sərt və tənqidi yanaşan "A Clockwork Orange" futurustik
bir proqnozdur, şübhəsiz bir şahəsərdir. Bütün şahəsərlər kimi bir başqasına
deyil yalnız özünə bənzəyir.
Stanley Kubrick "A Clockwork Orange" setində (1971)
Filmin əsas qəhrəmanı Aleksin cinayətkarlıq şəbəkəsi
burjua və proletar ayrıseçkiliyinə məhəl qoymadan qarşısına çıxan hər şeyi məhv
edən psixo sxemdir. Filmdə standart təhkiyə üslubundan xilas
olma cəhdləri sistem əleyhinə olan özünüifadə və anarxist bir rəftardır. İnsanlar
arasındakı daha çox güclənmək uğrunda gedən münaqişədə insanlıq anlayışından
qopduğuna şahid oluruq. İnsanlıq anlayışının məhv olması bir müddət sonra
iqtidarın gözətçiləri ilə-artıq tənha və çarəsiz bir fərd mövqeyinə düşən-Aleksi
qarşı-qarşıya gətirir. Bu hesablaşma isə qaçılmazdır. Əvvəllərdə çox da islah
olunmayacağına dair təcavüzkar və dağıdıcı portret cızan Aleksin sonlarda artıq
islah olduğunu görürük. Bu islaholunma filmin finalına aid olunun hissəyə təsadüf
edir: Aleksin başqa əlacı olmadığı üçün özünü iqtidarın şəfqətli qollarına təslim
etdiyində, daha doğrusu iqtidarın gözətçiləri-sistemin sadiq kölələri Aleksi öz
dünyasına qatanda.
Aleksi assimiliyasiya etmə siyasəti əvvəlcə nəcib
bir pedaqoqoun təşviqatı ilə başlayır. Bu cəhddən sonra “xəstə”də
müsbət nəticələr qeydə alınmadığı üçün həbsxana yöntəmlərinə keçid alınır. İşgəncə
metodlarına bənzəyən təcrübələrdən sonra yavaş-yavaş beyninin ələ keçirildiyinə
şahid olsaq da Aleks özünü asanlıqla təslim etmir. Ta ki qarşı qoymaq üçün gücü
tükəndiyində artıq çıxış yolu qalmadığını anlayanadək. Artıq Aleks təslimdir, iqtidarın şəfqətli qollarının istisini iliklərindək hiss edə bilir.
Xüsusilə təktipləşdirmənin ölçülərinə gətirdiyi baxış bucağı və bunu analiz etmə
şəkli filmin universal statusa malik olduğunu göstəricisidir.
Hər dövrün əsas düşüncə sistemi qaynağını dövlətin
idarəçiliyinin təşkili modelindən götürür. Yeri gələndə dövlət
bürokratik güc vasitələrini işə salaraq fərdləri yumşaldır, formalaşdırır,
onları nizam-intizamlı şəkildə “presləyir”. Düşüncə formasına/ideologiyasına tərs
olan mikrobları sterlizə edir, ictimai asayişi poza biləcək cəhdlərin qarşısını
alır. Dövlətin varlığını təhdid edən hadisələr meydana gələrsə təzyiq
mexanizmini gücləndirir, hər şeyi öz çıxarları üçün assimilə edir, lazım
olduğunda zorakılıq tətbiq etməkdən çəkinmir. Filmin sərt və dəqiq fomada
verdiyi suallar, xatırlatdığı mövzular isə bu mərhələdə üzə çıxır. Aid olduğu
sosial sinif fikir verilmədən cəmiyyəti formalaşdıran və ya cəmiyyətdən uzaq fərdlərin
düşüncə qəliblərinə, malik olduqları kimliklərinə xarici və nəzarət altında
olan müdaxilə nə qədər gərəklidir? Bu cür müdaxiləyə məruz qalan fərdlər nə qədər
azad ola bilər? Bu və ya buna bənzər tətbiq olunan vasitələr dövlətin qanuni vəzifəsi
hesab oluna bilərmi?
Qəlibləri pozan bir kino dominant Stanley Kubrick, "A
Clockwork Orange" filmində məsafəli xarakterini qoruyan sosioloq ədasına
bürünür. Dediyi kimi: “Film çəkmək asandır, çətin olan nəyin
çəkilməyidir”. Onun bu sözləri rejissorun üslub və formadan çox mövzunun təşkilinə
daha böyük
diqqət ayırdığını ifşa edir. Kubrick "A Clockwork Orange" filmi ilə iqtidarın
varlığını davam etdirə bilməyi üçün oynadığı oyunları fərdin azadlığı çərçivəsindən
sorğu-sual edir. Nəticə olaraq film müasir cəmiyyətin ironik təsvirdir.
1971-ci ildə "Warner
Brothers" studiyası tərəfindən çəkilən film 136 dəqiqəlik xronometraja
malikdir. 1973-cü ildə Stanley Kubrick həyat yoldaşına qarşı ölüm təhdidləri almağa
başlıyır və film İngiltərədə nümayişdən götürülür. Lakin buna baxmayaraq 80 və
90-cı illərdə insanlar Fransadan pirat disklər gətirərək filmi izləyir. 1993-cü
ildə isə İngiltərədə kifayət qədər məhşur olan "Scala Film Club"
filmi icazəsiz yayımladığına görə Stanley Kubrickin də təzyiqləri ilə "Warner
Brothers" studiyası tərəfindən böyük miqdarda təzminat ödəməli olur. Təzminatın
miqdarı o qədər yüksək olur ki, hətta "Scala Film Club" müflis olmaq
dərəcəsinə çatır. Film yalnız 2000-ci ildə Stanley Kubrickin ölümündən sonra 18+ yaş həddi qoyularaq İngiltərədə nümayiş olunmağa başlayır.
Film 1961-ci ildə Anthony Burgess tərəfindən
yazılan eyni adlı roman əsasında ekranlaşdırılmışdır. İstesalından 44 il keçməyinə
baxmayaraq "A Clockwork Orange" bu gün də ən yaxşı filmlər sırasında
yer almaqdadır.
Kinoda "Trilogiya" bir-biriləri ilə əlaqəli
bəzi üç seriyalı filmlərə kino yazarları və tənqidçilər tərəfindən verilən
addır. Kinodan başqa ədəbiyyat,
musiqi əsərləri, rəsm sənəti və video oyunlarında da trilogyalara rast gəlinir. Trilogiyaları iki hissəyə ayırmaq olar. Bunların bir
qolu davam filmlərinə, (The Evil Dead, Mad Max kimi) digər qolu isə eyni
rejissorun kamerasından çıxan və bir-birinin davamı olmasa da mövzu etibarı ilə yaxın olan filmlər trilogiya kimi qəbul edilir (Wim Wendersin yol filmləri,
İnarritunun "Ölüm" və Oliver Stonenin "Vyetnam"
trilogyaları kimi). 2000-ci illərdən başlıyaraq bəzi trilogiyalar 4 seriyalı çəkilməyə
başlayıb."İndiana Jones" və "Die Hard" trilogiyaları
bunlara nümunə ola bilər. Bu yazıda isə 10 ən yaxşı trilogiyanı müəyyənləşdirməyə çalışacağıq.
1- Three Colors - Krzystof Kieslowski (Üç Rəng
trilogiyası)
Wim Wenders adı nələri xatırladır? Dərhal mövzuya keçək.
Wenders Road-Movienin tarixini yenidən yazan, qısa çəkən Amerika macərasından
sonra nəfəsini yenidən öz xəritəsində-Avropada dərən və Amerikada yaşadığı təəssüfünün
əvəzini 1982-ci ildə çəkdiyi “The State of Things” (film Venesiyada əsas
mükafata layiq görülüb) filmi ilə çıxan, modern dünyadakı özgələşmə, şəxsiyyət
böhranı, tənhalıq və rabitəsizlik kimi mövzulara yer verən alman rejissorudur.
Bu qısa məlumatlar rejissor haqqında ilkin tanışlıq təəssüratları yaratsa da,
həmçinin rejissoru məhdudlaşdıra da bilir. Məsələni
çox əzib-büzmədən "Paris,
Texas" (1984)
filminə keçək.
"Paris, Texas"
filmininəsasqəhrəmanı Travisin (HarryDeanStanton) ruhivəziyyətinibelə bir şəkildə çərçivəyə yerləşdirməkmümkündür: özünü tapmaq, şəxsiyyətböhranı, özünü unutmaq, yenidən özününtapmaqvə yenidən şəxsiyyətböhranı. Varolma haqda problemlərin
sahilində gəzinən filmin
ucsuz-bucaqsız, insansız və mədəniyyətsiz isti çölü özünə metafora olaraq seçməsi
əlbəttə boş deyil. Çölün istisində buxarlanmağa meyilli olan Travis, sanki
insansız və mədəniyyətsiz çöl kimi “itib-batıb”. Bu əlbəttə bir hafizə itkisi,
beyin təxribatıdı. Bu travmanın nəticəsi olaraq Travis keçmişini, hətta özünü
unudur, yaddaşsız şəkildə isti çöldə qovrulmağa hazır ikən, bunun fərqinə varıb
qardaşına xəbər verirlər. Çöl metaforasının digər mənası isə filmin adını əhatə
edən və içinə alan daha böyük bir problemi göz önünə gətirir: mədəniyyətin
“sıfırlanmış” halı, “bütünlük axtarışının” iflası.
L`eclisse filmi,
Mikelancelo Antonioninin “Özgələşmə” trilogiyasının son filmidir (bəzi
kinokritiklərə görə “İl deserto rosso” filmi trilogiyanın davamı hesab olunur).
1962-ci ildə istehsal olunan filmin baş rollarını Monika Vitti və Alan Delon
canlandırıb. Mövzusu bir yazıçı ilə münasibət yaşayan tərcüməçi qadının onunla əlaqəni
kəsməyi, birja simsarı olan Piero ilə yeni münasibət qurmağa çalışmağından bəhs
edir. Bu zaman filmdə, İtaliyada baş verən iqtisadi möcüzə, kapitalizm, özgələşmə,
rabitəsizlik, insanların bir-birinə praqmatik münasibətləri və fərdlərarası əlaqələrdə
qırılma diqqətə çatdırılır. Antonioni digər rejissorlarla müqayisədə modern
kinoya daha yaxındır. Filmlərində daha çox modern həyata aid xüsusiyyətlər göz
önünə gətirilir. Antonioninin xarakteristik xüsusiyyətlərindən biri isə filmlərinin
əslində “son” ilə başlamağıdır.
Michelangelo Antonioni
Leclisse filmində Rikardo ilə Vittorianın
arasındakı münasibətin bitməyi “son”un başlanğıcıdır. Rejissor bu səhnədə “səssizliyi”
fiziki idrak olaraq istifadə edir. Bununla yanaşı bu element növbəti səhnələrin
şəkilləndirilməsində mühüm rol oynayır. Antonioni filmərində məkanın istifadəsi
olduqca özünəxasdır. Bunu filmin əvvəlində Rikardonun kresloda oturuş tərzindən
anlamaq mümkündür. Məkanın istifadəsi daha çox fraqmental bir şəkildədir. Məkanın
bu qaydada istifadəsi Antonioni filmoqrafiyasını vacib xüsusiyyətidir ki, bu
onu həm sürrealistlərdən, həm də amerikan eksperimentalistlərindən fərqləndirir.
Bununla belə Antonioninin quruluş verdiyi film bəlli bir məna yükü daşıyır.
Sürrealistlərdən fərqlənən xüsusi cəhəti isə bu məqamda ortaya çıxır.
Filmin istehsal tarixi
1962-ci ilə təsadüf edir. Bir çox film kimi bu filmi də çəkildiyi dövrün hadisələrindən
uzaqlaşdırmaq olmaz. 1962-ci il Sovet Rusiyası ilə Amerika arasında yaşanan
Karib böhranı və nüvə gərginliyinin yüksəldiyi tarix idi. Soyuq müharibə də
davam edirdi. Nüvə müharibəsinin məşum kölgəsi də daima filmin üzərindədir. Bu
ehtimal filmin bir neçə səhnəsində rastımıza çıxan göbələkvari qüllə və
Vittoria ilə Rikardonun küçədə gəzdiyi zaman ətrafın boş olması ilə tamaşaçıya
çatdırılır. Onlar səhər radələrində ətrafda gəzişərkən qarşılarından keçən tək
uşaq bu “apokaliptik” vəziyyətin simvolik təsviridir. Eyni zamanda bu
personajların da təcrid olunduğunu göstərir.
Ənənəvi cəmiyyətlərdə insanların şəxsi
profilini müəyyənləşdirən vasitələr var. Bunlara din, milliyyət, ailə və s.
misal çəkmək olar. Lakin modern bir cəmiyyətdə-Antonionin göstərməyə
çalışdığı-bu cür profil anlayışı zədələnir. Vittoria obrazının öz ailəsi ilə
rabitəsizliyi, xüsusu ilə anası ilə olan rabitəsizliyi olduqca diqqətə
layiqdir. Yaşadığı sevgi münasibəti də onu bu mənada təmin etmir. Bununla
yanaşı əslində yaşadığı rabitəsizlik pərişanlıq doğurur və bu da modernizmin
yaratdığı səbəblərə köklənir. Bu səbəblərə görə də Vittoria özünü daima
inamsızlıq içərisində hiss eləyir. Vittoria isə bunu yaşadığı ani xoşbəxtlik
vasitəsi ilə kompensasiya edə bilir. Bunu Vittorianın təsiredici üz ifadələrindən
rahat şəkildə anlamaq olur. Ani xoşbəxtlik nəticəsində üzü gülən Vittorianın
bir müddət sonra üz ifadəsi dəyişir, qaşqabağını tökür və birdən ciddiləşir.
Bunlarla yanaşı Antonioni filmin bir çox səhnəsində Vittorianın öz dünyasına
özgələşməyini, varolmanın təməlində dayanan tənhalığı göz önünə gətirir. Bu
rabitəsizliyin simvolik təsviri isə, Pieronun maşınını oğurlayan sərxoşun dənizdən
ölüsünü çıxaran zaman cansız bədənin maşının pəncərəsindən çölə sallanan əlidir.
Vittorianın yaşadığı tənhalıq,
rabitəsizlik olduqca hiss ediləndir. Onun filmdəki qısa çəkən xoşbəxtlik anları
heyrətləndiricidir, çünki belə hallarda fəqli bir obrazla qarşı-qarşıya gəlirik.
Qalan dəqiqələrdə isə o təcrid olunmuş və tənha haldadır. Antonioninin bizə deməyə
çalışdığı isə cəmiyyətdəki bütün strukturların çökmüş vəziyyətdə olduğudur. Bu
din ola biləcəyi kimi, ailə və insan əlaqələri də ola bilər. Buna görə də
obrazlar tərəddüd və boşluq içindədirlər. Tutunmağa yeri qalmadıqları üçün bir
növ məğlubdurlar, bu səbəbdən davamlı səndirləyirlər. Eynilə "Lavventura"
filmində Monika Vittinin öz rəfiqəsinin sevgilisi ilə yaşadığı əlaqədə və "La
Notte"-dəki Jan Marunun əri ilə arasındakı rabitəsizlikdə dəyərlər
sistemindəki boşluğu görmək mümkündür.
Modern insan ağıllı cəmiyyət
daxilində ağlın basqısını yaşamağa məcbur olan insandır. Bu ağıllılıq isə
burjua həyatında xüsusi ilə gözə çarpır. Modern toplumda ağıl anlayışının əmələ gətirdiyi təzyiq siniflərin bir-biri arasında qurduğu güc olmaqdan çıxıb bütün cəmiyyəti
əhatələyib. Tarixi olaraq insanın insana hökm etməsi mərhələsindən ağlın insana
hökm etməsi mərhələsinə keçilib. Hökm edən də, hökm olunan da ağıllı sistemin
yaratdığı qaydalara görə hərəkət edir. Ağıl insanın və cəmiyyətin üzərinə
çıxaraq, onu müəyyənləşdirmiş, hiss və duyğularını kütləşdirməyə başlamışdır.
İnsan bu cür təzyiq altında azad deyil. Maariflənmə çağından bəri, insana daha
çox azadlıq imkanı yaradacağı düşünülən ağlın əslində insanı məhdudlaşdırdığını
görürük.
Bu açıqlamalardan bir
sual doğur. Antonioni siyasi filmlər rejisorudurmu? Əlbəttə elədir. Amma o da
Jan-Luk Qodar kimi bizə cavabdan çox sual verir və bunu edərkən də hər hansı
bir tərəfin mövqeyini qorumur. Filmləri modern cəmiyyət haqqında olduqca təməl
suallar verir. Modernleşmənin insanlığa nə qazandıracağı kimi. Antonioninin qəribə
bir tərəfi var ki, filmlərində gözlənilməz hadisələr baş verir (bu gözlənilməz
hadisələr nəticəsində mövzudan uzaqlaşmalar baş verir). Xüsusilə Marta və
Vittorianın əvvəl rəqs etməyi sonra müstəmləkəçilik siyasəti haqda diskussiyası
və daha sonra çöldən gələn səslərə görə itləri axtarmağa başladıqlarında
meydana gələn hadisələr silsiləsi buna nümunədir. Bu hadisələr silsiləsinin
bir-biri ilə bağlılığı demək olar ki yoxdur. Tamaşaçıya daha çox bir-birlərindən
ayrı, fərdi səhnə təəssüratı yaradır. Film bu cür rabitəsiz səhnələr meydana gətirməkdədir
ki, bu səhnələr də təklikdə bir məna kəsb eləmir. Səhnələrarası məntiq
ardıcıllığı ilk baxışda gözə çarpmır. Pioronun bir fahişə ilə görüşü fərdi səhnə
təsiri yarada bilər, lakin bu xəfif qadının saçlarına rəng qoymağından dolayı bəyənməməyi
onun xarakteri haqda məlumat ötürür. Antonionin bu xüsusiyyəti isə daha çox
neorealist köklərə qədər gedib çıxır. Roberto Rosellinin 50-ci illərin əvvəlində
çəkmiş olduğu "Viaggio in İtalia" bu tip filmlərdəndir.
Antonioni demək olar ki
filmdə musiqidən istifadə etməyib. Onun yerinə dialoqlar, qışqırıqlar və səssizilik
Antonioni tərəfindən ən təsirli istifadə olunan elementlərdir. Bu Roma
birjasında paqan rituallarını xatırladan gurultu-səssizlik qarşıdurması ilə
Vittorianın səssizliyini göstərən səhnələrdə ən yaxşı şəkildə istifadə olunub.
Səssizlik vacib bir elementdir. Böyük faciələrə cavab verməyən modern insana
bir qınaqdırmı səssizlik?
Antonioni stilinin
vacib elementlərindən biri də “ölü zaman” anlayışıdır. "L'Eclisse"-də də “Ölü zaman” anlayışından
tez-tez istifadə olunub. Filmin sonlarına yaxın Piero ilə Vittorianin yaşlı
cütlüyün arxasında durduğu səhnə bunun klassik bir nümunəsidir. Filmin əsas
obrazları bu yaşlı cütlüyün yanından uzaqlaşdıqdan sonra müəyyən müddət kamera
onların üzərində dayanır və klassik musiqi dinlənilir. Buradakı zaman anlayışı
ssenarinin gedişatından qaynaqlanan zaman deyil. Antonioni burada sadəcə
tamaşaçını bundan sonra hekayənin hansı şəkildə irəliləyəcəyinin kənarında
düşünməyə vadar edir və bizdən gələcəyə doğru baxmağımızı istəyir. Filmdəki
obrazlarda əlaqələrin ölçüsünə dair yaranan boşluq da bu səbəbdəndir.
Film və Antonioni haqda
yazılan tənqidlərə, xüsusilə Berqman tərəfindən yazılan tənqidlərə diqqət
yetirsək, Berqman Antonionini qeyri-peşəkar və Monika Vittini də bacarıqlı lakin
etibarsız aktrisa kimi vurğulamışdı. Berqman ənənəvi film texnikasının
ustasıdır. Qaydalara daha çox riayət edir. Lakin Antonioninin bu qaydalara diqqət
etdiyini demək olmaz. Onun kino texnikası standartlara uyğun deyil. Ənənəvi kino
aspektindən baxıldığı zaman, kamera səhnəyə hakimdir və tamaşaçıya istədiyini
göstərir. Antonioninin kamerası isə hər zaman alternativi, mövzudan kənarı göz
önünə gətirir. Monika Vittiyə gəlincə… Onunla Antonioni arasındakı münasibət
olduqca fərqlidir. Jan-Luk Qodar-Anna Karina ya da Jozef von Sternberq-Marlen
Ditrix münasibətləri kimi kamera arxasında rejissorun “gözəllik simvoludur”.
Son olaraq, bu ağır
film Antonioni filmoqrafiyasının əsas filmlərindən biridir. Dəfələrlə izlənib
müzakirə olunası filmdir təbii ki, əgər filmin əks etdirdiyi zülmətə dözmək
mümkün olarsa.
Filmin
qəhrəmanı 16 yaşındakı gənc qız Lilya (Oksana Akinşina), keçmiş Sovetlər
Birliyində adı bilinməyən (amma Estonyanın paytaxtı Tallinn olduğu görsənir) liman şəhərlərinin birində anası (Lyubov Aqapova) ilə birgə yaşamaqdadır.Baltik dənizi sahilində xarabaya
dönmüş yaşayış binalarınınolduğubu kasıb yaşayışməntəqəsindəhəyat çox çətindir. İşsizlik,
yoxsulluq və onun gətirdiyi səfaləthər
yerdə özünü göstərməkdədir. Sovetlər Birliyi dövründəburada fəaliyyət göstərən və şəhərin
iqtisadi həyatını canlandıran gəmi limanınını bağlanması, şəhərəçox böyük
iqtisadi zərbəvurur. Daha əvvəlburadaaşbazlıq etmiş olan Lilyanın anası bir
gün birdən qızını tərkedərək,sevgilisiylə birlikdə ABŞ-a gedir.
Gedərkənisə qızıLilyanıxalasınatapşırır. Lakin o da Lilya ilə
maraqlanmır, əksinə onu öz evindən çıxardaraq Lilyaya başqa bir yerdə baxımsız,
kiçik bir otaq kiralayır. Özü isə həmən evdə yaşamağa başlayır. Lilya
atasının kim olduğunu belə bilmir. Onun atası isə anasıyla bir zamanlar qısa
bir əlaqə yaşayıb ortadan itmiş olan moskvalı bir dəniz zabitidir.
Lukas Moodysson
Lilya
bütün yoldaşlarına anasının Amerikaya onu da aparacağını bildirir, amma
xəyal qırıqlığına uğrayınca oxuduğu orta məktəbi də yarımçıq qoyur. Anası
Lilyaya Amerikaya çatan kimi pul göndərəcəyini deyir. Amerikaya çatdıqdan sonra
isə sosial xidmətlərə məktub yazaraq ondan imtina etdiyini bildirir və yalnız
başına qalan Lilya yarı ac, yarı tox yaşamağa başlayır. Bir gün Lilya rəfiqəsi
Nataşa (Elina Benenson) ilə birlikdə qəsəbədəki bir gecə klubuna gedir. Burada
Nataşa fahişəlik etməklə pul qazanır. Lilya isə bunu bacarmır və evinə geri
dönür. Ertəsi gün isə Nataşanın iftirasıyla məhəllədə damğalanan Lilya olur.
Artıq Lilya məhəllənin işsiz-gücsüz və narkoman oğlanlarının potensial hədəfi
halına gəlir. Günlərin birində isə onların cinsi təcavüzünə məruz qalır.
Lilya
bundan sonra daha da içinə qapanır və məhəllədəki 12 yaşlı bir uşaq olan Volodya
(Artyom Boquçarski) ilə münasibət qurmağa başlayır. Volodya alkoqolik atası
tərəfindən küçəyə atılmış, saf və zavallı bir uşaqdır, kağızdan düzəltdiyi
toplarla basketbol oynayır. Lilyanın küçələrdə yatıb-qalxan, evsiz-eşiksiz
bu uşağa yazığı gəlir və onu evinə gətirir. Volodya ilə Lilya birlikdə
tez-tez tərk edilmiş gəmi limanına gedir və spirt içib, uyuşdurucu maddə
istifadə edirlər. Lilya bir müddət sonra aclığa dözə bilmir və
istəməyə-istəməyə daha əvvəl getmiş olduğu gecə klubuna gedərək pul qarşılığında
yaşlı bir adamla yatır. Qazandığı ilk pulla kiçik dostuna bir basketbol topu
hədiyyə edir və qarınlarını tıxa basa doldururlar.
Lilya və kiçik dostu Volodya Baltik dənizi sahilində tərkedilmiş dəniz limanında
Bütün
ümidlərini itirdiyi bir anda Lilyanın qarşısına Andrey (Pavel Ponomaryov)
adında yaraşıqlı bir gənc çıxır. Lilya özünə dostca münasibət göstərən bu pullu
gəncə (Andreyin yaxşı bir avtomobili var) aşiq olur. Davamlı olaraq İsveçi
tərifləyən Andrey Lilyaya birlikdə bu ölkəyə getməyi təklif edir. Orda yaxşı iş
imkanlarının olduğunu bildirən Andrey Lilyaya saxta bir adla (18 yaşı tamam
olmadığı üçün) pasport düzəltdirir. Ancaq son anda nənəsinin öldüyünü bəhanə
edərək təyyarəyə minmir. Lilyanın təyyarəsi İsveçin Malmö şəhərinə enincə onu
Andreyin dostu qarşılayır və bir evə apararaq qapını arxadan bağlayır. Artıq
aldadıldığını başa düşən Lilya sonrakı günlərdə sadəcə yemək qarşılığında
onlarla, yüzlərlə müştəri ilə yatır. Lilya
artıq bir seks köləsi olmuşdur. Qaçmağa cəhd
etdiyindədöyülür. Tallindəki kiçikdostuVolodyanın qanad taxmış qarabasmasıtez-tez Lilyanın yuxularına girir.Birgün
isəfürsət tapıb qaçmağı bacaranLilya bir şose körpüsündən özünü
aşağıya ataraq intihar edir.
Daima
Lilya 2002-ci il İsveç - Danimarka ortaq istehsalı olan dram filmidir.
Ssenarisini Lukas Moodissonun yazıb çəkdiyi filmin musiqilərini Nathan Larson
bəstələmişdir. Filmin əvvəlində isəRammsteinin ifasında "Mein Herz
Brennt" mahnısı səslənir.
İsveçli
rejissor Lukas Moodissonun üçüncü uzun metrajlı filmi olan "Daima
Lilya" sərt və real quruluşuyla rejissorun eşq və komediya tərzlərindəki
ilk iki filmindən olduqca fərqlidir. "Lilya"-nı canlandıran, filmin
Rus baş rol oyunçusu Oksana Akinşina film çəkildiyində sadəcə 15 yaşında idi.
Filmin digər oyunçuları da Ruslardır. Film 2000-ci ildə iş vədi ilə aldadılaraq
İsveçə aparılan, orada isə pasportu əlindən alınıb sonra da seks köləsi halına
gətirilən və sonunda intihara sürükləndirilən Litvalı Danguole Rasalaitenin
gerçək həyat hekayəsi əsasında ekranlaşdırılmışdır.
İsveçdən
kənarda ilk dəfə 30 avqust 2002-ci ildə Venesiya Film Festivalında göstərilən
"Daima Lilya" müxtəlif festival və müsabiqələrdən tam 12 mükafat
qazanmışdır. Həmçinin film İsveçin "ən yaxşı xarici film"
nominasiyasında Oskar Mükafatına namizədi olaraq seçilmiş, lakin filmdəki
dialoqların çoxu Rus dilində olduğuna görə yarışmaya buraxılmamışdır.
Amerika Kino Akademiyasının qaydalarına görə mükafat uğrunda mübarizə aparmaq
üçün film aid olduğu ölkənin öz dilində çəkilməlidir.
2003-cü ildə ekranlara çıxan
“Oldboy” filmi Cənubi Koreya kinosunun dəyər qazanmasına səbəb olan, daha
doğrusu diqqətdən kənarda qalmış Uzaq Şərq filmlərinə yenidən maraq oyadan bir
şahəsərdir. Məsələyə bu aspektdən baxıldığı zaman filmin taleyinin Akira Kurosavanın
“Rashomon”u ilə eyni olduğunu görərik. Eyni taleyi paylaşan bu filmlər arxasını
qərbə dönüb, üzünü şərqə-günəşə doğru çevirmiş bir mədəniyyətin oyanışı
deyilmi? Filmin rejissoru Çan Uk Park Alfred Hiçkok və Roman Polanskiyə olan
rəğbəti ilə tanınır. Rejissor bu filmi ilə sıravi insanların başına heç də
sıravi hadisələrin gəlmədiyini göstərib. Həmçinin bu ekran əsəri rejissorun
“Qisas” trilogiyasının ikinci filmidir.
Chan-wook Park
Film başladığı ilk səhnədən
etibarən tamaşaçını cəld bir şəkildə ələ alır, fonda səslənən “Look Who’s
Talking” musiqisi ilə kəşfi gözləyən bir qitəyə səyahətə aparır. Üzü seçilməyən
naməlum şəxs, intihar etməkdə olan bir digərinin qalstukundan tutmuş vəziyyətdə:
“Ölümü sonraya saxla, sənə öz hekayəmi danışacağam” deyir. Bu replikadan sonra
film tamaşaçını kənara itələyir və qəhrəmanı ilə üzləşməyə imkan vermir.
Tamaşaçı boğazından tutulmuş bir şəkildə obrazın dilindən sadəcə hekayənin
bəlli bir qismini eşidə bilir. “Bir heyvandan betər olsam da yaşamağa haqqım
yoxdurmu?”
Adı Oh Dae-Su (Min-sik Choi) olan
qəhrəmanımızın adı “insanlarla yaxşı keçinən” mənasını daşısa da
əslində insanlarla yola gedə bilmədiyini göstərmək üçün tamaşaçının qarşısına
polis bölməsində çıxır. Lakin bölmədən çıxdığı gecə naməlum şəkildə yox olur
(xüsusi ilə burada çətirin üstündəki fona diqqət yetirmək lazımdır). Harada
olduğu bəlli olmayan otağa (otağın divarındakı fon çətirin üzərindəki fonla
eyni olduğunu görürük) salınan Oh Dae-Sunun 15 il müddətinə buradakı həyatına
şahid oluruq. Niyə burada olduğuna dair heç bir fikri olmayan qəhrəmanımız, bir
anda hər şeyi yazmağa qərar verir. “Mənasız həyat yaşadığımı fikirləşirdim amma
xeyli günah işləmişəm” cümləsi Oh-Dae Sunun daxili səsi ilə deyilir və film
boyunca Oh Dae-Sunun iç səsi tamaşaçıya bələdçilik edir. 15 il müddətində bir
otaqda saxlanılan Oh-Dae Su buradan çıxıb və bunu edənlərdən qisas almağın
planlarını qurur. Burada diqqət edilməli əsas nöqtə, qəhrəmanın televizor izlədiyi
zaman görünən qısa bir kadrdır. Bu kadrda “Bride of Frankenstein” (1935,
rej. James Whale) filmindən səhnə görünür (məxluqun siqaret çəkdiyi səhnə). Bu
səhnə qəhrəmanımızın məxluqata çevrildiyinə dair kiçik bir mesajdır. Oh Dae-Su
burada qaçmaq üçün plan hazırlayarkən, gözlənilmədən bir binanın ən üst
mərtəbəsində özünü tapır və film yenidən əvvələ qayıdır.
15 ilin qisasini kimdən alacaq?
Necə alacaq? Tamaşaçı bu tip suallar verərkən cavablara aparan açar nəsnələr
ortaya çıxır. Bir telefon, bir portmanat, bir az pul və bir anda zəng: Sən
kimsən? Məni niyə otağa həbs etdin? Suallar, cavablar. Qəhrəmanın zehni
bulanıqlığına səbəb olur. Gedib kafedə canlı osminoq yemək bəzən sağlamlıq üçün
bəzən də zehin açıqlığına xeyirlidir. Kafedə tanış olduğu qızın əlinə toxunan
Dae-Su gerçəyin özü ilə üzləşməyə hazırdır. İki insanı tale yaxınlaşdırır yoxsa
bu insanların iradəsindən asılıdır? Ya da üçüncü bir şəxsin bunu etməyə gücü
çata bilərmi? Artıq bu andan etibarən film tamaşaçını hipnoz etməyə başlayır.
İstifadə olunan metaforalar vəhşiləşmiş məxluq kimi ətrafda gəzişir. Hər
tərəfdə rastımıza çıxan (çətir-Oh Dae-Sunun otağı-dəsmal və hipnoz səhnəsindəki
fon) fon əlaqələri tamaşaçını da qəhrəmanın özünü də gerçəklikdən
uzaqlaşdırır.
Corab söküyü kimi hər şeyi
çözələməyə başlayan Dae-Su, sonda 15 illik saxlanıldığı otağın sahibini tapır
və Vivaldinin “4 Mövsüm” musiqisinin fonunda dişlərini kəlbətinlə çıxarır.
Üstəlik bu əsər filmdə istifadə olunan və soundtrack siyahısında yer almayan
tək əsərdir. Zorakılığı poetikləşdirən bu səhnənin oxşarına Stenli Kubrikin “A Clockwork Orange” filmində də rastlamaq mümkündür. “Oldboy” da yer alan bu
səhnə “A Clockwork Orange” da Aleksə Bethovenin 9-cu simfoniyasının fonunda
edilən ruhi işgəncənin bədən tapmış halıdır. Ardınca koridordakı möhtəşəm bir
plan ardıcıllığı ilə davam edən döyüş səhnəsinin bir dəfəyə çəkildiyini də qeyd
etsək yerinə düşər. Aldığı yaralar ucbatından yuvarlanan Dae-Sunun köməyinə
gələn papaqlı şəxs əlindəki dəsmalı ona verir (diqqət, dəsmalın üstündəki fon
yenə eynidir). Axtarışlarına davam edən Oh Dae-Sunun şəxsiyyətinə, şüuruna və
həyatına nüfuz edən qisas anlayışı artıq bir vasitə olmaqdan çıxıb onun
həyatındakı tək məqsədidir. Beləliklə, film insanın ən primitiv anlayış tərzinə,
bir şüuraltı manifestinə çevrilməyə başlayır. Filmdə suallar artdıqca
tamaşaçının da zehnini bulandırır, buna baxmayaraq film özünü izlətdirə biləcək
qədər şüurları dik saxlaya bilir. Ta ki qisas alınacaq şəxs, “Sən kimsən?”
sualının cavabı tapılanadək. Filmin ortası olmağına baxmayaraq Oh Dae-Sunu
otağa salan şəxs özünü ifşa edir. Buna görə Alfred Hiçkokun Psixo filmindəki
əsas qəhrəmanın filmin ortasında öldürülməsi ilə eyniləşdirmək mümkündür.
Filmin sonuna 1 saat qalarkən Li-Vu Jin (Ji-tae Yu) ilə tanış oluruq. Ancaq Oh
Dae-Sunun nə edəcəyini bilməməklə yanaşı, hələ qisas üçün bəlli bir planı da
yoxdur. Çünki içini yeyən qisas almaqdan çox niyə həmin otaqda saxlanıldığıdır.
Qəhrəmanımız maraq hissinə məğlub olur. Maraq hissi insana ən qədim zamanlardan
miras qalıb və onun inkişafında mühüm rol oynayıb. Filmin qırılma nöqtəsi də
elə buradan başlayır. Li Vu-jin, Oh Dae-Su ilə oyun oynayarkən, tamaşaçı ilə
rejissor arasında da bir oyun başlayır. Səhv suallar və səhv cavablar hər şeyin
yenidən əvvələ qayıtmağına səbəb olur . Qəhrəmanımız artıq qisasdan uzaqlaşıb
və suallara cavab axtarmağa başlayıb. Bu əsnada soruşduğu ən vacib sual “Niyə
15 il müddətinə bir otaqda saxlanılmışam?” olur. Oh Dae-Sunun 15 ilik əzabının
səbəbini tapmaq üçün 5 gün vaxtı vardı. “Mənasız həyat yaşadığımı fikirləşirdim
amma xeyli günah işləmişəm.” cümləsinin altında əzilməyə başlayır və hər şey
yavaş-yavaş aydınlığa qovuşur. Artıq şüuraltındakı hər şey tək-tək ortaya çıxır
və əvvəllər işlədiyi günahların əvəzini ödəyir, bunu isə sonra anlayır. Xüsusi
ilə keçmişə və şüuraltına etdiyi səyahətə aid səhnələr kino antologiyasında yer
ala biləcək potensialdadır. Dae-Su lazım olmayan hadisələrə şahidlik edən bir
məktəblidir artıq. Li-Vu Jinin bacısına olan ehtirasını, sevgisini nümayiş
elətdirdiyi bir keçmiş yavaş-yavaş canlanır. Yaşanılan qəbul olunmaz sevginin
mahiyyətini qavramayan kiçik Oh Dae-Su bu hadisəni hamıya danışır.
Mifologiya görülən insan
davranışlarının bir növ təzahürüdür. Yaşanılan və hiss edilən hər bir duyğu və
hadisələr mifologiyada var. Həmçinin bir çox insani duyğular və olaylar
təkallahlı dinlərdə də baş verib. Qabilin öz bacısını sevməyi və onun uğrunda
qardaşı Habili öldürməyi bu tip cinayətlərin birincisi olmağına dair ən vacib
misaldır. İnsanlar genləri ilə bir-birinə bir çox şeyi miras qoyur: Bu əsnada
“Günahlarımız da miras yolu ilə keçə bilərmi?” sualı qarşımıza çıxır. Eyni
zamanda Hz. Adəmin cənnətdən qovulması və o günahın əvəzini insanoğlunun
çəkməsi bir növ bizə qalan miras-günah deyilmi?
Mifoloji dəyərlərə mötərizə
açdıqda, qarşımıza Freydin Elektra və Oidipus kompleksləri, yenə eyni şəkildə
və eyni tavan altında birləşir. İstər təkallahlı dinlərdə, istər çoxallahlı
dinlərdə olsun insanın şüuraltında yatan insest münasibətlər həmişə qapalı bir
qutu, bir tabu olaraq qalacaq. Lakin Oldboy da bu zaman aktivləşir. Kino
tarixində az hallarda müraciət olunan mövzunu bir qisas hekayəsi ilə göz önünə
gətirir.
Oh Dae-Su otağa həbs olunduğunun
səbəbini tapır. Hesablaşmaq üçün Lee Voo Jinin qaldığı binanın aşağı
mərtəbəsinə gedir. Ancaq qarşısına daha bir sual çıxır. Tamaşaçıları da
yanıldan “Məni niyə 15 il bir otaqda saxlanılmışam” yerinə “Məni niyə azad
etdin?” sualı bir anda yenidən fikirlərdə qarışıqlıq yaradır. Yavaş-yavaş hər
şey aydınlamağa başlayır. Bütün gerçəklər gün kimi parıldayır, bəzi gerçəklər
isə qutuda bağlı şəkildə qalır və ya qalmalıdır. Dae-Sunun qarşısında bir qutu
var (bəs fon kimin yadinda? Çətir-dəsmal-otaq indi də qutu). Qutu açılanda
qəhrəmanımızı alt-üst edən həqiqətlərlə qarşılaşır. Pandoranın qutusunu yenə
bir kişi açır. Qarşısındakı ailəvi şəkillər albomunu vərəqlədikcə restoranda
tanış olduğu qızın öz qızı olduğunu anlayır. Ətrafı sükut ələ keçirir,
qışqırıqlar eşidilməz olur, dodaqlar möhürlənib. Oh Dae-Su öz qızı ilə
yatağa girib! Qəhrəmanımızın açdığı qutunun eynisi qızının da önündədir.
Açılacaq yoxsa bağlı qalacaq? Pandoranın qutusu açıldığında şər dünyaya necə
yayılıbsa eyni zamanda qutunun dibində qalan ümid ilə şərə qarşı dayanmağı
bacarıb insan. Lakin bəzi həqiqətlər bu qutuda qalmalıdır. Bunu göz önünə gətirən
film, Midonun (Oh Dae-Sunun qızı) qutusunun açılmağına icazə vermir və həqiqət
gizlədilir. Bunu bilən Dae-Su qayçı ilə dilini kəsir, bütün bu günahlarının
əvəzini bu şəkildə ödəyir. Film 120 dəqiqəlik xronometraja malikdir və 110 dəqiqə ərzində Oh Dae-Sunun qisas hekayəsini izlədikdən sonra, son dəqiqələrdə U dönüşü edib, Li Vu-jinin eşq hekayəsinə çevrilir.
Film yenə bu şəkildə bitmir, “Bir
heyvandan betər olsam da yaşamağa haqqım yoxdurmu?” cümləsi bu dəfə hipnoz edən
həkimin dilindən deyilir. Qəhrəmanımız artıq dilsizdir və hər şeyi unutmaq,
hadisəni şüuraltının ən qaranlıq diyarına yollamaq üçün bir daha hipnoz
olunmağı seçir. Yenə Vu-jinin qaldığı evin üst mərtəbəsində gözləməkdədir
(diqqət, işıq oyunları ilə hərəkətsiz dayanan Oh Dae-Sunun silueti
Frankensteinə bənzəyir). Məxluq bu kadrdan sonra ölüb, gerçəyi bilən tək insan
da artıq yox olub.
Son olaraq filmin soundtacklərinə
də diqqət yetirsək yerinə düşər. Fondakı “Look Who’s talking” musqisi ilə giriş
səhnəsindəki bağlılıq möhtəşəmdir. Filmin bütün musiqilərinin bəstəkarı isə Co
Yong-Vukdur. Diqqət çəkən məsələ isə musiqi ilə eyni anda gələn səhnələrin
uyğunluğudur. Oh Dae-Su qızını axtararkən arxa planda “The Searchers” musiqisi
eşidilir.
Bir başqa səhnədə Li Vu-jin öz
bacısı ilə sinifdə qaçarkən fondakı musiqi “Breathless”dir. “The Last Waltz”
Martin Skorsezenin muzikal filmlərindən biridir. Hər musiqi bir filmin adına və
o filmin mənasına uyğun gəlir. Digər bir səhnədə- yenə Oh Dae-Sunun uşaqlığına
qayıtdığı səhnədə Li Vu-jin bacısı ilə velosiped sürərkən velosipedin zınqırov
səslərinin fonunda “For from the bell tolls” musiqisi eşidilir. Zınqırov
isə bu dəfə Oh Dae-Su üçün səslənir.