"Nə yeyilən yeməklərin dadı var burada, nə isti
şokoladın nə də sevişmələrin"
Jens Lienin rejissorluğunu etdiyi "The Bothersome
Man" filmi maraqlı mövzusu və xüsusi quruluşu ilə diqqət çəkir. Postmodern
bir kino dilinə sahib olan hekayənin ən əhəmiyyətli xüsusiyyəti utopik bir
dünyanın təsvir edilməsidir. Filmdə "Hər şeyə sahib olan insan həyatda
başqa nədən zövq ala bilər?" kimi bir sual üzərindən cəmiyyətin dinclik
anlayışı və fərdin maraqları fərqli bir dillə izah edilir.
Qəhrəmanımız Andreasın (Trond Fausa) timsalında içində
yaşadığımız cəmiyyətə uyğunlaşa bilməyən bir adamın tragikomik hadisələrin
yaşandığı bir məkana səfərinə şahidlik edirik. Elə bir dünya düşünün ki, orada insanların yedikləri və içdiklərinin artıq heç
bir dadı qalmamışdır. Sevginin mənasının da dəyişdiyi bu dünyada müsbət və mənfi
olan hər şeyin aradan qalxdığını görürük. Neytral bir süjet xətti ilə irəliləyən
hekayənin atmosferi nihilist bir anlayışa sahibdir. Filmdə insanın təkliyi,
müasir cəmiyyətin çətinliyi və insanlığın hissizliyi üzərinə qara bir yumor yaradılmışdır.
Təsəvvür edin ki, siz bir metro stansiyasındasınız
və stansiyada sizdən başqa bir-biri ilə dəlicəsinə öpüşən cütlük var. "The Bothersome Man" Andreasın şahid olduğu və sanki sonsuza
qədər eyni şəkildə davam edəcəkmiş kimi irəliləyən bir "öpüşmə" səhnəsi
ilə açılır. Diqqətli baxdığınızda bu "dəlicəsinə" öpüşmənin içərisində heç
bir hiss və duyğunun qalmadığının, bir az daha diqqətli baxdığınızda isə eyni
öpüşmənin robotlaşmış bir şəkil aldığının və bu cəmiyyətdəki insanların "insan"
kateqoriyasına aid edilən duyğularından
tamamilə uzaqlaşmış hala gəldiklərinin şahidi olacaqsınız.
Norveç istehsalı olan film 2006-ci il Kann Film
Festivalında ACID mükafatına layiq görülüb. Bundan başqa film qatıldığı müxtəlif
festivallardan 19 mükafat qazanıb.
Andreas rolundakı Trond Fausaya isə "Ən yaxşı kişi aktyor"
nominasiyasında Norveç Amanda mükafatı verilib.
0 Şərh:
Yorum Gönder